ដោយៈ ម៉ាណេត
ភ្នំពេញៈ រដ្ឋាភិបាលវៀតណាម នឹងអភិវឌ្ឍន៍ប្រព័ន្ធហេដ្ឋារចនាសម្ព័ន្ធ ពាណិជ្ជកម្មព្រំដែនរវាងខេត្តGia Lai និងតំបន់នានារបស់កម្ពុជា ដែលមានព្រំដែននឹងវៀតណាម ដើម្បីលើកកម្ពស់សកម្មភាពជួញដូរ និងផ្លាស់ប្តូរទំនិញក្រោមកម្មវិធី អភិវឌ្ឍន៍ហេដ្ឋារចនាសម្ព័ន្ធពាណិជ្ជកម្ម នៅតាមច្រករបៀងព្រំដែនវៀតណាមនៅឆ្នាំ២០២៥ និងចក្ខុវិស័យដល់ឆ្នាំ២០៣០។ នេះបើយោងតាមការចេញផ្សាយរបស់សារព័ត៌មាន VNA នៅថ្ងៃទី៩ ខែសីហា ឆ្នាំ២០២១។
គណៈកម្មាធិការប្រជាជននៃខេត្តGia Lai ទើបតែចេញនូវផែនការស្តីពីការអនុវត្តកម្មវិធីមួយ ដែលត្រូវបានអនុម័តដោយនាយករដ្ឋមន្រ្តីវៀតណាម ដើម្បីជំរុញកិច្ចសហប្រតិបត្តិការអភិវឌ្ឍ និងតភ្ជាប់ហេដ្ឋារចនាសម្ព័ន្ធពាណិជ្ជកម្មព្រំដែន រវាងយ៉ាឡៃ និងខេត្តជាប់ព្រំដែនរបស់កម្ពុជា ក្នុងការជំរុញសក្តានុពល និងប្រយោជន៍របស់ភាគីទាំងពីរ។ គណៈកម្មាធិការ ក៏មានគោលបំណងជួយទាក់ទាញវិនិយោគិន និងលើកទឹកចិត្តការវិនិយោគឯកជនក្នុងការសាងសង់ និងការអភិវឌ្ឍហេដ្ឋារចនាសម្ព័ន្ធតាមព្រំដែនផងដែរ។
កម្មវិធីនេះ នឹងពង្រឹងកិច្ចសហប្រតិបត្តិការជិតស្និទ្ធ រវាងតំបន់ព្រំដែនក្នុងវិស័យសេដ្ឋកិច្ចពាណិជ្ជកម្ម និងវប្បធម៌សង្គម ដោយរួមចំណែកធ្វើឱ្យប្រសើរឡើងនូវការរស់នៅរបស់ប្រជាជននៅតាមព្រំដែន ក៏ដូចជា ធានាដល់ការការពារជាតិសណ្តាប់ធ្នាប់សង្គម និងសុវត្ថិភាពនៅមូលដ្ឋាន។
យោងតាមផែនការរដ្ឋាភិបាលវៀតណាម ខេត្តGia Lai នឹងសហការជាមួយក្រសួងឧស្សាហកម្ម និងពាណិជ្ជកម្ម ដើម្បីបង្កើតបញ្ជីហេដ្ឋារចនាសម្ព័ន្ធពាណិជ្ជកម្មព្រំដែន ជាមួយនឹងគម្រោងអាទិភាព ដោយប្រើប្រាស់ថវិការបស់រដ្ឋ និងគម្រោង ដែលទាមទារការវិនិយោគឯកជន។
អាជ្ញាធរខេត្តនេះនឹងពិនិត្យ និងកែសម្រួលផែន វិនិយោគលើការធ្វើឱ្យប្រសើរឡើង និងកសាងហេដ្ឋារចនាសម្ព័ន្ធ និងការងារសង្គមនៅក្នុងតំបន់សេដ្ឋកិច្ចច្រកទ្វារព្រំដែនអន្តរជាតិ Le Thanh ហើយក៏នឹងលើកកម្ពស់គម្រោងធ្វើឱ្យប្រសើរឡើង នូវទីផ្សារព្រំដែន ដើម្បីសម្រួលដល់ការផ្លាស់ប្តូរទំនិញឆ្លងកាត់ ច្រកទ្វារព្រំដែនអន្តរជាតិនេះផងដែរ។
ខេត្តនេះមានបំណង ផ្តល់អាទិភាពដល់ការបែងចែកថវិកាថវិការដ្ឋ ដើម្បីសាងសង់គម្រោងហេដ្ឋារចនាសម្ព័ន្ធព្រំដែន ដោយមិនមានវិស័យឯកជនចូលរួម លើកទឹកចិត្ត និងជួយសហគ្រាសចូលរួម ក្នុងការសាងសង់ទីផ្សារពាណិជ្ជកម្មតាមព្រំដែន។
នាពេលខាងមុខនេះ អាជ្ញាធរខេត្តនឹងគាំទ្រដល់ការផ្លាស់ប្តូរ និងចរាចរទំនិញ និងកិច្ចព្រមព្រៀងកិច្ចសហប្រតិបត្តិការ រវាងតំបន់ព្រំដែននៃខេត្តGia Lai និងខេត្តរតនគីរី (កម្ពុជា)។
ការអភិវឌ្ឍនឹងផ្តោតលើការពង្រឹងគុណភាពធនធានមនុស្ស ដើម្បីគ្រប់គ្រង និងអភិវឌ្ឍន៍ ក្រុមពាណិជ្ជករតាមរយៈការផ្សព្វផ្សាយច្បាប់ និងគោលនយោបាយស្តីពីប្រភពដើមនៃទំនិញ និងវិធីទូទាត់ ដោយចុះកិច្ចកិច្ចព្រមព្រៀង និងការផ្លាស់ប្តូរបទពិសោធន៍ជាមួយពាណិជ្ជករ និងអ្នករស់នៅតាមព្រំដែន។
មន្ទីរឧស្សាហកម្មនិងពាណិជ្ជកម្មខេត្តខាងលើនេះ ត្រូវបានចាត់តាំងឱ្យសម្របស ម្រួលជាមួយទីភ្នាក់ងារពាក់ព័ន្ធ ក្នុងការលើកកម្ពស់ការវិនិយោគ ដើម្បីទាក់ទាញអាជីវកម្មទាំងក្នុង និងក្រៅខេត្តឱ្យចូលរួម ក្នុងការអភិវឌ្ឍហេដ្ឋារចនាសម្ព័ន្ធពាណិជ្ជកម្មព្រំដែន៕
