ដោយៈ ម៉ាណេត
ភ្នំពេញៈ ក្រោមហេតុផលសំខាន់ៗមួយចំនួន បានធ្វើឱ្យអ្នកជំនាញជាតិ និងអន្តរជាតិចំនួន៤រូប បង្ហាញពីភាពជឿជាក់ថា និងព្យាករថា នៅឆ្នាំ២០២១ខាងមុខនេះ វិស័យអចលនវត្ថុនៅក្នុងរាជកម្ពុជា នឹងទទួលបានកំណើន និងងើបចេញពីវិបត្តិកូវីដ១៩ ដែលពិភពលោកកំពុងប្រឈមនាពេលបច្ចុប្បន្ន។
ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា លោក ច្រឹក សុខនីម បានមានប្រសាសន៍ថា តម្រូវការទីផ្សារអចលនវត្ថុក្នុងស្រុក គឺនៅតែបន្តមានដដែល ជាពិសេសផ្នែកលំនៅដ្ឋាន ខុនដូកម្រិតមធ្យមរួមនឹងការប្រើប្រាស់ដី។
លោកបានបន្តថា “ត្បិតថាថ្នាំបង្ការជំងឺឆ្លងអាច នឹងត្រូវបានប្រើប្រាស់ជាផ្លូវការនៅត្រឹមដើមឆ្នាំ២០២១ ប៉ុន្តែមិនមែនមានន័យថា ទីផ្សារអចលនទ្រព្យនឹងមានភាពល្អប្រសើរស្របពេលនៃការប្រើថ្នាំបង្ការនោះទេ” ។ លោកបន្តថា“វាត្រូវការពេលវេលាក្នុងការស្រោចស្រង់ឡើងវិញ លុះត្រាតែកំណើននៃការព្យាបាល ទទួលបានលទ្ធផលច្រើន ហើយការចម្លងត្រូវបានទប់ស្កាត់បានដោយជោគជ័យ ដែលវាត្រូវការពេលយូរ។
លោកបានអះអាងថា “តាមខ្ញុំគិត ត្រូវចំណាយពេលមិនតិចជាង១ឆ្នាំ ឬអាចលើសនេះ ទើបអាចមានភាពល្អប្រសើរឡើងវិញ គ្រាន់តែថាចាប់ពីពាក់កណ្តាលឆ្នាំ២០២១ សកម្មភាពដែលផ្តើមចេញពីក្នុងស្រុក នឹងចាប់កម្រើកឡើងវិញជាបណ្តើរៗ ជំនួសភាពអវត្តមានរបស់អ្នកវិនិយោគធំមកពីក្រៅប្រទេស” ។
ទីប្រឹក្សាសមាគមអចលនទ្រព្យសាកល ស្ថាបនិក និងជាអគ្គនាយកនៃគេហទំព័រ Propertyarea.asia លោកយិន លាងគង់ ដែលបានតាមដានដំណើរវិវត្តន៍ នៃសេដ្ឋកិច្ច និងអចលនទ្រព្យបានថ្លែងថា គ្រប់ស្ថាប័នហិរញ្ញវត្ថុធំៗលើពិភពលោក សុទ្ឋតែព្យាករណ៍ពីសន្ទុះនៃការងើបឡើងវិញ នៃសេដ្ឋកិច្ចកម្ពុជានៅឆ្នាំ២០២១ ហើយរដ្ឋាភិបាលបានព្យាករណ៍ផងដែរថា សេដ្ឋកិច្ចកម្ពុជានឹងងើបឡើង៣,៥ភាគរយ ដែលជាសញ្ញាវិជ្ជមានសំរាប់វិស័យនេះ។
លោកបន្តថា “ស្ទើរគ្រប់ផ្នែកនៃវិស័យអចលនទ្រព្យ នឹងមានការរីកចម្រើន ដោយសារសកម្មភាពសេដ្ឋកិច្ចកម្ពុជា ចាប់ផ្តើមវិលមករកភាពប្រក្រតីវិញ ដែលនេះជាការប្រមើលមើលរបស់ធនាគារពិភពលោក” ។ លោកបន្តថា “ការចាប់ផ្តើមអនុវត្តន៍កិច្ចព្រមព្រៀងពាណិជ្ជកម្មសេរីជាមួយប្រទេសចិន (FTA) កម្ពុជានឹងទទួលបានផលចំណេញច្រើនពីកាលានុវត្តន៍ភាពមាសនេះ ពិសេសកម្ពុជាបាននិងកំពុងធ្វើពិពិធកម្ម ទីផ្សាររបស់ខ្លួនកាន់តែទូលំទូលាយក្នុងក្របខ័ណ្ឌតំបន់ និងពិភពលោក” ។
លោកយិន លាងគង់បន្តថា ភាពអំណោយផលនៃសេដ្ឋកិច្ច ការកសាងបទដ្ឋានគតិយុត្តិរបស់រដ្ឋាភិបាល ដែលទទួលសម្រួលនិងលើកទឹកចិត្តអ្នកវិនិយោគ ពិសេសការពង្រីកការសាងសង់ ហេដ្ឋារចនាសម្ព័ន្ឋនឹងជួយឲ្យវិស័យនេះ មានភាពរីកចម្រើនកាន់តែលឿនថែមទៀតនាពេលអនាគត។
ជាមួយគ្នានេះ លោកស្រីអាន សុធីតា នាយិកាប្រចាំប្រទេសក្រុមហ៊ុន CBRE Cambodia បានមានប្រសាសន៍ថា រហូតដល់ឆ្នាំ២០២១ខាងមុខនេះ តម្លៃអចលនវត្ថុនៅក្នុងរាជធានីភ្នំពេញ ដែលរួមមានតម្លៃដីធ្លី និងសំណង់លំនៅដ្ឋាននានានៅតែបន្តរក្សាបាននូវលំនឹងដូចឆ្នាំ២០២០ដដែល។
លោកស្រីបានបញ្ជាក់ “ទាំងតម្លៃដី ទាំងតម្លៃអចលនវត្ថុផ្សេងៗ ដូចជា សំណង់លំនៅដ្ឋាន ខុនដូជាដើម គឺអាចបន្តបានស្ថានភាពដូចបច្ចុប្បន្នដដែល លើកលែងតែម្ចាស់អចលវត្ថុមួយចំនួនតូច ដែលមានបញ្ហាចរន្តសាច់ប្រាក់បន្ទាន់ ពួកគាត់អាចនឹងបង្ខំចិត្តប្រកាសលក់ក្នុងតម្លៃមួយទាបជាងទីផ្សារតែប៉ុណ្ណោះ” ។
លោកស្រីបន្តថា នៅក្នុងរាជធានីភ្នំពេញ បើនិយាយពីតម្រូវការនៃការប្រើប្រាស់ដីសម្រាប់អភិវឌ្ឍន៍ គម្រោងផ្សេងៗគឺនៅតែបន្តមាន ប៉ុន្តែចំពោះផ្ទៃដីដែលទំនេរហាក់មិនមានច្រើននោះទេ ដែលជាហេតុជំរុញឱ្យតម្លៃដីឡើងថ្លៃជារៀងរាល់ឆ្នាំ លើកលែងតែក្នុងអំឡុងឆ្នាំ២០២០នេះ ដោយសារតែបញ្ហានៃជំងឺឆ្លង ដែលកំពុងរាតត្បាតជាសាកល ទើបធ្វើឱ្យតម្លៃនៅលើទីផ្សាររួមស្ថិតនៅក្នុងសភាពទ្រឹង ប៉ុន្តែមិនធ្លាក់ចុះនោះទេ។
ចំណែកលោកខាត់ សុវណ្ណ នាយកក្រុមហ៊ុនភ្នាក់ងារអចលនទ្រព្យ CamTop Property Group បានមានប្រសាសន៍ថា អត្រាភាគរយច្រើននៅឆ្នាំ២០២១ សេដ្ឋកិច្ចសាកល អាចនឹងចាប់ផ្តើមល្អជាបណ្តើរៗឡើងវិញ ហើយវិស័យអចលនទ្រព្យនៅកម្ពុជាក៏នឹងវិលត្រឡប់ទៅរកភាពល្អប្រសើរឡើងវិញផងដែរ ហើយក្នុងនោះក៏នឹងមានកំណើនក្រុមហ៊ុនថ្មីៗបន្ថែមទៀតចូលមកក្នុងទីផ្សាររួម ដែលវាអាចជាបញ្ហាប្រឈមជាមួយនឹងក្រុមហ៊ុនភ្នាក់ងារមួយចំនួន។
លោកបានមានប្រសាសន៍បញ្ជាក់ថា “ជាធម្មតានៅពេលដែលវិស័យណាមួយរីកចម្រើន វានឹងជម្រុញឱ្យមានការប្រកួតប្រជែងគ្នាជាមិនខាន។ ដោយឡែកសម្រាប់ទីផ្សារអចលនទ្រព្យនៅកម្ពុជា នៅក្នុងឆ្នាំ២០២១ខាងមុខខ្ញុំជឿថា ក៏នឹងមានវត្តមានក្រុមហ៊ុនថ្មីៗចូលមកបន្ថែមទៀតជាមិនខាន ដែលក្នុងនោះមានទាំងក្រុមហ៊ុនក្នុងស្រុក និងក្រុមហ៊ុនអន្តរជាតិផងដែរ” ៕
