ដោយគង់ ម៉ាលីនណា
ភ្នំពេញៈ ចង់ដឹងដី ផ្ទះរបស់អ្នក ឬអចលនទ្រព្យផ្សេងៗទៀតមានតម្លៃប៉ុន្មាន មិនមែនជារឿងស្មុគ្រស្មាញពេកនោះទេ លោក អ្នកគ្រាន់តែប្រើប្រាស់វិធីសាស្ត្រងាយៗទាំងនេះ អាចដឹងតម្លៃអចលនទ្រព្យរបស់អ្នកមានតម្លៃប៉ុន្មានមិនខាន។
ទីប្រឹក្សាសមាគមអចលនទ្រព្យ សកល លោកយិន លាងគង់ បានបង្ហើបវិធីសាស្ត្រមួយចំនួន ដើម្បីដឹងពីតម្លៃអចលនទ្រព្យរបស់អ្នកនាពេលបច្ចុប្បន្ន និងអាចប្រមើលមើលពីអនាគតបានផងដែរ។
វិធីសាស្ត្រវាយតម្លៃលំនៅដ្ឋានរបស់អ្នក
តម្លៃលំនៅដ្ឋានរបស់អ្នកមានតម្លៃប៉ុន្មាន ខ្ពស់ឬទាបជាងទីផ្សារ នៅពេលអ្នកចង់លក់? អ្នកអាចប្រើប្រាស់វិធីសាស្ត្រនេះ គឺសិក្សាតម្លៃអចលនទ្រព្យនៅជុំវិញតំបន់របស់អ្នក ឬនៅក្នុងបុរី ឬសំណង់ផ្ទះល្វែងដែលអ្នករស់នៅ តើគេបានទិញ និងលក់ក្នុងតម្លៃប៉ុន្មាន? ។
នៅពេលអ្នកដឹងពីតម្លៃគេទិញ លក់ នៅក្បែរលំនៅដ្ឋានរបស់អ្នករួចហើយ អ្នកនឹងអាចយកតម្លៃមូលដ្ឋាននោះ យកមកប្រៀបធៀបនឹងតម្លៃផ្ទះរបស់អ្នក ទំហំ និងទីតាំងផ្ទះរបស់អ្នកថា តើខុសគ្នា ឬស្រដៀងគ្នា ព្រោះបើមានទំហំផ្ទះដូចគ្នាឬស្រដៀងគ្នា តម្លៃផ្ទះរបស់អ្នក អាចនឹងមានតម្លៃប្រហាក់ប្រហែលផ្ទះ របស់អ្នកជិតខាងរបស់អ្នកនោះឯង។ លើកលែងតែលំនៅដ្ឋានរបស់អ្នកស្ថិតនៅចំណុចពិសេសណាមួយ។
តម្លៃសំណង់លំនៅដ្ឋានរបស់អ្នក
វិធីសាស្ត្រមួយទៀត ដែលគេនិយមយកមកប្រើប្រាស់ គឺដើម្បីចង់ដឹងតម្លៃលំនៅ ដ្ឋានរបស់អ្នក មានតម្លៃប៉ុន្មានពិតប្រាកដលើទីផ្សារ គឺគេអនុវត្តន៍តាមវិធីសាស្ត្រមួយនេះ ដោយគេយកតម្លៃដីធ្លីចេញ។ ឧទាហរណ៍ដីផ្ទះរបស់អ្នកមានទទឹង៥ គុណនឹង២០ម៉ែត្រ វាស្មើនឹង១០០ម៉ែត្រការ៉េ ហេតុនេះគេនឹងវាយតម្លៃដីនៅតំបន់នោះ ក្នុងមួយម៉ែត្រការ៉េប៉ុន្មាន ហើយយកមកគុណនឹងទំហំដីរបស់អ្នក លោក អ្នកនឹងរងឃើញដីរបស់អ្នកមានតម្លៃប៉ុន្មានហើយ។
ចំណែកសំណង់ដែលនៅសល់លើដីនោះ គេវាយតម្លៃតាមតម្លៃសាងសង់តើអស់មួយការ៉េប៉ុន្មាន បូកនឹងថ្លៃជាងសាងសង់ ពេលនោះលោក អ្នកនឹងរកឃើញតម្លៃពិតនៃផ្ទះរបស់អ្នកយ៉ាងច្បាស់លាស់ហើយ ដោយយកតម្លៃដី បូកជាមួយតម្លៃសំណង់ លោក អ្នកនឹងដឹងថា ផ្ទះរបស់អ្នកមានតម្លៃប៉ុន្មានពិតប្រាកដហើយ។
ការវាយតម្លៃដីធ្លី
តម្លៃដីធ្លីអាចមានការប្រែប្រួល និងមានលក្ខណៈពិសេសជាងលំនៅដ្ឋានបន្តិចត្រង់ថា បើដីរបស់អ្នកមានទំហំ រូបរាង សណ្ឋានដីខុសគ្នា លោក អ្នកមិនអាចធៀបជាមួយនឹងតម្លៃដីរបស់អ្នក និងដីអ្នកជិតខាងឡើយ។ លោក អ្នកត្រូវចាំថា តម្លៃដីរបស់អ្នកថ្លៃឬថោក វាអាស្រ័យលើទំហំដី ប្លង់រូបរាងដី ហេដ្ឋារចនាសម្ព័ន្ឋ កត្តាប្រជាសាស្ត្រ និងសក្តានុពលនៅជុំវិញដីរបស់អ្នកបានទិញ ឬវិនិយោគយកផលចំណេញ។
ករណីដីរបស់អ្នកមានសណ្ឋាន រូបរាងស្រដៀងគ្នា នឹងដីរបស់អ្នកជិតខាង គឺតម្លៃដីរបស់អ្នក គឺមានភាពស្រដៀងនឹងដីអ្នកជិតខាងផងដែរ ប៉ុន្តែការកើនឡើងឬថយចុះតម្លៃ វាអាស្រ័យលើពេលវេលា កាលៈទេសៈដែលអ្នកលក់ចេញផងដែរ។
ប៉ុន្តែបើលក់ពេលដំណាលគ្នា លោក អ្នកអាចសិក្សាពីតម្លៃដី ដែលគេបានទិញនៅជិតខាងអ្នក និងដីដែលគេទើបបានលក់ចេញនៅក្បែរខាងអ្នក នោះលោក អ្នកអាចយកតម្លៃដីដែលគេបានទិញ និងលក់នៅជិតខាងលោក អ្នកយកមកធៀបគ្នា ដោយគុណយកតម្លៃមធ្យមភាគ លោក អ្នកនឹងរកឃើញតម្លៃដីរបស់អ្នកពិតប្រាកដមិនខាន។
ប៉ុន្តែលោក អ្នកត្រូវចងចាំថា ដីដែលមានទំហំធំ តែងតែមានតម្លៃទាបជាងដីដែលមានទំហំតូច ហើយតម្លៃអចលនទ្រព្យណាមួយពិតប្រាកដ មិនមែនឈរលើមាត់អ្នកចង់លក់នោះទេ ប៉ុន្តែវាស្ថិតនៅលើតម្លៃដែលអ្នកទិញហ៊ានទិញប៉ុណ្ណោះ៕
