ដោយៈ លក្ខិណា
ភ្នំពេញៈ អ្នកជំនាញ និងវិនិយោគិនលើវិស័យអចលនទ្រព្យរំពឹងថា ព្រឹត្តិការណ៍សហគមន៍២០កុម្ភៈ នឹងត្រូវបញ្ចប់នៅពេលឆាប់ៗ ឬអាចយ៉ាងយូរត្រឹមពាក់កណ្ដាលឆ្នាំ២០២១នេះ ហើយនឹងអាចឱ្យវិនិយោគិន នឹងចាប់ផ្ដើមបង្កើនសកម្មភាពវិនិយោគឡើងវិញ។
លោកប៉ូ អ៊ាវគង់ ប្រធានក្រុមហ៊ុនអចលនទ្រព្យ Advance បានឱ្យដឹងនៅថ្ងៃទី១២ ខែមីនា ឆ្នាំ២០២១នេះថា កាលពីឆ្នាំ ២០២០ កម្ពុជាក៏ជួបប្រទះនឹងជំងឺកូវីដ១៩នេះដែរ តែកាលនោះ រដ្ឋាភិបាលទប់ស្កាត់ការចម្លង និងរក្សាបរិមាណមួយដែលអាចគ្រប់គ្រងបាន តែចូលដល់ឆ្នាំ២០២១ អំឡុងខែកុម្ភៈ២០២១ នេះ ក៏ស្រាប់តែកម្ពុជាជួបនឹងបញ្ហាឆ្លងសហគមន៍ និងមានទ្រង់ទ្រាយកាន់តែធំ ដែលអាចធ្វើតំបន់ជាច្រើនបានឆ្លងនឹងជំងឺកូវីដក្នុងសហគមន៍។
លោកបន្តថា សម្រាប់ព្រឹត្តិការណ៍នេះ លោកជឿថាវានឹងបញ្ចប់នៅត្រឹមខែដំណាច់ខែនេះឬដើមខែក្រោយ ដូច្នេះយ៉ាងយូរពាក់កណ្ដាលឆ្នាំ២០២១ អាជីវកម្មនានានឹងចាប់ផ្ដើមកម្រើកឡើងវិញ ហើយវិនិយោគិននានានឹងចាប់ផ្ដើមដាក់ទុនឡើងវិញ ពីព្រោះថាវ៉ាក់សាំងប្រឆាំងនឹងកូវីដ១៩ ក៏បានចាក់ជូនពលរដ្ឋបន្តបន្ទាប់ ហើយវានឹងបញ្ចាប់ការវ៉ាក់សាំងនៅពេលខាងមុខដែរ ដែលអាចកាត់បន្ថយការចម្លងបានផងដែរ ។
អ្នកគ្រប់គ្រងជាន់ខ្ពស់ផ្នែកស្រាវជ្រាវនៃក្រុមហ៊ុន CBRE Cambodia កញ្ញាគឹម គិនកេសា បានឱ្យដឹងថា ព្រឹត្តិការណ៍សហគមន៍នេះវានឹងលឿនពេក ដូច្នេះទើបបណ្ដាលឱ្យមានឆ្លងរាលដាលក្នុងសហគមន៍ តែយ៉ាងណាកញ្ញារំពឹងថា រដ្ឋាភិបាលនឹងអាចបញ្ចប់ការឆ្លងនេះ បានឆាប់ ដែលនឹងជំរុញឱ្យមានសកម្មភាពវិនិយោគឡើងវិញទាំងក្នុងនិងក្រៅស្រុក។
កញ្ញាបន្តថា ក្នុងឆ្នាំ២០២១នេះ ការវិនិយោគពីក្រៅស្រុក អាចនឹងបន្តធា្លក់ចុះទៀត តែការវិនិយោគ ពីខាងក្នុងស្រុកនឹងចាប់ផ្ដើមបន្តបន្ទាប់ឡើងវិញ នៅពេលចប់ព្រឹត្តិការណ៍សហមន៍២០កុម្ភៈនេះ ជាមួយនឹងគម្រោងតូចៗ ។
គិតមកដល់ថ្ងៃទី១២ខែមីនា ២០២១នេះ អ្នកឆ្លងកូវីដ១៩ ក្នុងសហគមន៍មានចំនួនជាង៧០០នាក់ធ្វើឱ្យអ្នកឆ្លងកូវីដ១៩នៅកម្ពុជាសរុបហក់ឡើងដល់ជាង១២០០នាក់។ ដោយឡែកគិតត្រឹមព្រឹកថ្ងៃទី១២ មីនា ២០២១ កម្ពុជាប្រកាសរកឃើញអ្នកឆ្លងកូវីដ១៩ថ្មីចំនួន៦២នាក់ ក្នុងនោះដែរ ៦០នាក់ជាអ្នកពាក់ព័ន្ធនឹងសហគមន៍២០កុម្ភៈ២០២១ ហើយក៏មានអ្នកស្លាប់១នាក់ផងដែរ កាលពីថ្ងៃទី១១មីនា ២០២១ ៕
