ដោយៈ វណ្ណារ៉ា
ភ្នំពេញៈ នៅក្នុងវិបត្តិនៃជំងឺកូវីដ១៩ ដែលកំពុងរីករាលដាលនៅក្នុងប្រទេសកម្ពុជានៅពេលនេះ ត្រូវបានអ្នកជំនាញលើកឡើងថា វាជាឱកាសល្អមួយសម្រាប់អ្នកស្វែងរកលុយបន្ថែម ពីធនាគារសម្រាប់ទិញអចលនទ្រព្យ ព្រោះធនាគារមួយចំនួន បាននឹងកំពុងប្រកួតប្រជែងគ្នាយ៉ាងខ្លាំងដើម្បីបានអតិថិជន។
លោកបណ្ឌិតហុង វណ្ណៈ អ្នកស្រាវជ្រាវសេដ្ឋកិច្ចនៃរាជបណ្ឌិត្យសភាកម្ពុជាបានមានប្រសាសន៍នៅល្ងាចថ្ងៃទី១ ខែមេសា ឆ្នាំ២០២១ថា ក្នុងអំឡុងពេលនេះ ការផ្តល់ប្រាក់កម្ចីដល់ប្រជាពលរដ្ឋ សហគ្រាសធនតូច និងមធ្យម និងវិស័យឯកជនផ្សេងពីស្ថាប័នធនាគារ និងគ្រឹះស្ថានហិរញ្ញវត្ថុ គឺជារឿងល្អមួយក្នុងការជួយគ្នាទៅវិញទៅមក តាមរយៈការបញ្ចុះអត្រាការប្រាក់ ឬលើកលែងការផាកពិន័យនៅពេលនេះ។
លោកបន្តថា “ក្នុងការផ្តល់កម្ចីដល់ប្រជាពលរដ្ឋ និងវិស័យឯកជននានាសម្រាប់ស្រោចស្រងអាជីវកម្ម និងពាណិជ្ជកម្មនៅពេលនេះ វិស័យធនាគារ និងហិរញ្ញវត្ថុត្រូវតែបង្កើតគោលនយោបាយពិសេសណាមួយ និងវិធានការថ្មីៗដើម្បីទប់ទល់ ព្រមទាំងពិភាក្សាជាមួយរដ្ឋាភិបាល ដើម្បីគ្រប់គ្រង និងផ្តល់ឥណទានពិសេសដល់ពលរដ្ឋ ក៏ដូចជាសហគ្រាសធនតូច និងមធ្យម ជាពិសេសអ្នកដែលមានបំណងយក ទៅពង្រីកការអភិវឌ្ឍន៍ វិនិយោគក្នុងវិស័យអចលនទ្រព្យ” ។
ឧកញ៉ាម៉ាន់ ច័ន្ទឌី អគ្គនាយក្រុមហ៊ុន Premium Group បានមានប្រសាសន៍ថា នៅក្នុងវិបត្តិនេះ វាក៏ជាឱកាសល្អសម្រាប់អ្នករកស៊ី ឬអ្នកមានធនធាន ក្នុងការវិនិយោគលើវិស័យអចលនទ្រព្យ ដោយអ្នកមានលុយគ្រប់គ្រាន់ គេអាចទិញអចលនទ្រព្យបានល្អ និងធូថ្លៃ ហើយវាក៏ជាឱកាសល្អ សម្រាប់អ្នកដែលមានបំណងខ្ចីលុយធនាគារបន្ថែមសម្រាប់ធ្វើការវិនិយោគអចលនទ្រព្យផងដែរ។
លោកថ្លែងថា “នាពេលបច្ចុប្បន្ននេះ ខ្ញុំមើលឃើញធនាគារ មានការប្រកួតប្រជែងខ្លាំង ដោយធនាគារខ្លះមានអត្រាការប្រាក់ទាបមែនទែន គឺក្នុង៤.៩ភាគរយសម្រាប់កម្ចីទិញលំនៅឋាន ដែលកាលពីមុនមិនមាននោះទេ ហើយក៏ជាឱកាសល្អសម្រប់បងប្អូនអ្នកវិនិយោគច្រើនដែរ” ។
លោកបញ្ជាក់ទៀតថា នៅក្នុងវិបត្តិនេះ ក៏ជាកាសសម្រាប់អ្នកចង់បានលំនៅឋានឬ ដីឡូតិ៍ផងដែរ តាមការបង់ជាមួយនឹងម្ចាស់គម្រោងផ្ទាល់ ដោយមិនមានបង់ប្រាក់មុន ប៉ុន្តែសំខាន់ឱ្យតែយើងមានលទ្ធភាព ក្នុងការបង់ប្រចាំខែ ដល់ម្ចាស់គម្រោងអភិវឌ្ឍន៍ខែតប៉ុណ្ណោះ។
ទោះជាយ៉ាងណា អ្នកឧកញ៉ាលី ហួរប្រធានសមាគមអ្នកអភិវឌ្ឍន៍លំនៅដ្ឋានកម្ពុជាបានព្រមានថា បើមានធនធានក្នុងដៃសម្រាប់វិនិយោគ សូមគិតឲ្យបានច្បាស់លាស់ ចាំគូរ ព្រោះបើគូរលុប គូរលុបមិនទទួលបានជោគជ័យទេ ពិសេសការវិនិយោគបែបប្រថុយប្រថាន បែបហេង ស៊យ មិនគួរធ្វើនោះទេ បើសិនជាអ្នកវិនិយោគមិនមានធនធានផ្ទាល់ខ្លួន៕
