ដោយៈសុខុម
សេអ៊ូល: ក្រុមហ៊ុន SK Innovation Co Ltd របស់កូរ៉េខាងត្បូង បានប្រកាសកាលពីថ្ងៃពុធ ទី១ កញ្ញា ថា ខ្លួននឹងបោះទុនវិនិយោគ១.២ទ្រីលានវ៉ុន (១.០៤ពាន់លានដុល្លារអាមេរិក) ដើម្បីសាងសង់រោងចក្រផលិតអាគុយថ្មីមួយ នៅប្រទេសចិន។ នេះបើយោងតាមការចុះផ្សាយរបស់សារព័ត៌មាន The Edge Markets។
ការវិនិយោគនេះធ្វើឡើង ស្របពេលបណ្ដាក្រុមហ៊ុនផលិតរថយន្ត ទូទាំងពិភពលោកសម្រុក ងាកទៅផលិតរថយន្តអគ្គិសនី (EV) ដើម្បីគោរពតាមបទប្បញ្ញត្តិនានាស្ដីពីកិច្ចការពារបរិស្ថាន ដែលនាំឱ្យតម្រូវការអាគុយរថយន្តអគ្គិសនីកើនឡើងខ្លាំង។
ក្រុមហ៊ុនកូរ៉េខាងត្បូង ដែលផ្គត់ផ្គង់អាគុយរថយន្តអគ្គិសនី ដល់ក្រុមហ៊ុនផលិតរថយន្តជាច្រើន រួមមាន ក្រុមហ៊ុន Ford Motor Co ក្រុមហ៊ុន Volkswagen ក្រុមហ៊ុន Hyundai Motor Co និងក្រុមហ៊ុនមួយចំនួនទៀតនេះ មានរោងចក្រផលិតអាគុយនៅប្រទេសជាច្រើន រួមមាន សហរដ្ឋអាមេរិក ប្រទេសហុងគ្រី ប្រទេសចិន និងប្រទេសកូរ៉េខាងត្បូង ជាដើម។
ទោះជាយ៉ាងណា ក្រុមហ៊ុន SK Innovation មិនបានផ្តល់ព័ត៌មានលម្អិតអំពីគម្រោងសាងសង់រោងចក្រផលិត អាគុយថ្មីរបស់ខ្លួន នៅក្នុងប្រទេសចិននាពេលណាឡើយ។
កាលពីខែកក្កដា ក្រុមហ៊ុន SK Innovation និយាយថា ខ្លួនមានបំណងបង្កើនសមត្ថភាព ផលិតអាគុយប្រចាំឆ្នាំរបស់ខ្លួន ឱ្យឈានដល់២០០ជីហ្គាវ៉ាត់ម៉ោង (GWh) នៅត្រឹមឆ្នាំ២០២៥ ដោយកើនឡើង៦០% បើធៀបនឹងគោលដៅ១២៥ជីហ្គាវ៉ាត់ម៉ោងដែលខ្លួនបានប្រកាសមុននេះ។ បច្ចុប្បន្នក្រុមហ៊ុននេះ មានសមត្ថភាពផលិតបានត្រឹមតែ៤០ជីហ្គាវ៉ាត់ម៉ោងបុណ្ណោះ៕
