ដោយៈម៉ាណេត
ភ្នំពេញៈ ក្រុមហ៊ុនបច្ចេកវិទ្យាហិរញ្ញវត្ថុ (Fintech) និងក្រុមហ៊ុនទូទាត់តាមប្រព័ន្ធអេឡិចត្រូនិក (Paytech) បាននិងកំពុងវិនិយោគនៅប្រទេសកម្ពុជា ដែលជាទិសដៅទាក់ទាញសម្រាប់ការវិនិយោគ។ នេះបើយោងតាមការចេញផ្សាយរបស់ Fintech Times កាលពីថ្មីៗនេះ។
ការប្រើប្រាស់ទូរស័ព្ទចល័ត ដែលមានអត្រាដល់ទៅ១២៤% របស់កម្ពុជាត្រូវបានគេចាត់ទុកថា ស្ថិតក្នុងចំណោមប្រទេស ដែលមានអត្រាខ្ពស់បំផុត នៅលើពិភពលោក ហើយការប្រើប្រាស់គណនីហ្វេសប៊ុកសកម្មមានជាង១១លានគណនី។
គណនីប្រើប្រាស់កាបូបអេឡិចត្រូនិក (ឬហៅថា e-wallet) ៥.៥លានគណនីបាននិងកំពុងដំណើររួចហើយនៅក្នុងប្រទេសនេះ ហើយកម្ពុជាក៏កំពុងស្ថិតនៅក្នុងការឈានទៅរកវដ្តថ្មីមួយនៃការប្រើប្រាស់បច្ចេកវិទ្យាហិរញ្ញវត្ថុផងដែរ។
ការប្រើប្រាស់សាច់ប្រាក់ នៅតែមានភាពទូលំទូលាយនៅក្នុងប្រទេសកម្ពុជា។ ភាគច្រើន នៃការទូទាត់ប្រាក់នៅតែជាប្រតិបត្តិការជាក់ស្តែង និងដោយផ្ទាល់។ ប៉ុន្តែជាមួយនឹងការកើនឡើង នៃបច្ចេកវិទ្យាហិរញ្ញវត្ថុនៅក្នុងប្រទេស វាគ្រាន់តែត្រូវការពេលវេលា មុនពេលផ្លាស់ប្តូរទៅរកការទូទាត់តាមប្រព័ន្ធឌីជីថល។
ប្រព័ន្ធធនាគារនៅកម្ពុជា ត្រូវបានធ្វើទំនើបកម្មជាបន្តបន្ទាប់ ស្របតាមនិម្មាបនកម្មហិរញ្ញវត្ថុអន្តរជាតិ និងបានរួមចំណែកស្នូល ក្នុងការរក្សាស្ថិរភាពម៉ាក្រូសេដ្ឋកិច្ច គាំទ្រកំណើនសេដ្ឋកិច្ច លើកកម្ពស់បរិយាបន្នសេដ្ឋកិច្ចនិងសង្គម និងកាត់បន្ថយភាពក្រីក្រ។
ធនាគារជាតិនៃកម្ពុជា (NBC) បានធ្លាប់លើកឡើងថា “ប្រព័ន្ធធនាគារក៏បានប្រើប្រាស់បច្ចេកវិទ្យាហិរញ្ញវត្ថុ (Fintech) ក្នុងប្រតិបត្តិការ ជាពិសេសសម្រាប់ការទូទាត់ ដែលបាន លើកកម្ពស់បរិយាបន្នហិរញ្ញវត្ថុកម្ពុជាជាលំដាប់” ។
ជាក់ស្តែង ប្រជាជនពេញវ័យដែលទទួលបានសេវា ហិរញ្ញវត្ថុផ្លូវការកើនឡើងដល់ប្រមាណជាង៧០% បើធៀបនឹងពីរទសវត្សរ៍មុន (តិចជាងប្រមាណ ១០% ប៉ុណ្ណោះ)៕
