ដោយៈសុខុម
អាមេរិក: ក្រោយឡើងថ្លៃខ្ពស់បំផុត មិនធ្លាប់មានកាលពីពេលថ្មីៗនេះ តម្លៃប្រេងបានធ្លាក់ចុះ២ថ្ងៃជាប់គ្នា កាលពីថ្ងៃសុក្រ ទី១៩ កុម្ភៈ ខណៈបណ្ដាក្រុមហ៊ុនថាមពលនៅរដ្ឋតិចសាស សហរដ្ឋអាមេរិក ត្រៀមចាប់ផ្ដើមដំណើរការផលិតប្រេង និងឧស្ម័នឡើងវិញ ក្រោយបិទផ្អាកជាបណ្ដោះអាសន្ន ដោយសារមានព្យុះព្រិលទឹកកកដ៏កំណាច។
យោងតាមការចុះផ្សាយរបស់ទីភ្នាក់ងារព័ត៌មាន Reuters ឱ្យដឹងថា ប្រេងឆៅនៅក្នុងទីផ្សារប្រទេសអង់គ្លេស បានធ្លាក់ថ្លៃ១,១៦ ដុល្លារ ឬ១,៨% មកនៅត្រឹម ៦២,៧៧ ដុល្លារក្នុងមួយបារ៉ែល ខណៈប្រេងឆៅនៅក្នុងទីផ្សារសហរដ្ឋអាមេរិក បានធ្លាក់ថ្លៃ១,៤២ ដុល្លារ ឬ ២,៤% មកនៅត្រឹម៥៩,១០ដុល្លារក្នុងមួយបារ៉ែល។
ក្រុមអ្នកវិភាគបានលើកឡើងថា “ព្យុះព្រិលទឹកកដ៏កំណាច មិនធ្លាប់មាននៅក្នុងរដ្ឋតិចសាស និងបណ្ដារដ្ឋវាលទំនាបរបស់សហរដ្ឋអាមេរិក បានធ្វើឱ្យការផលិតប្រេងឆៅធ្លាក់ចុះរហូតដល់ ៤ លានបារ៉ែលក្នុងមួយថ្ងៃ ហើយការផលិតឧស្ម័នធម្មជាតិធ្លាក់ចុះ២១ ពាន់លានហ្វីតគូប (ប្រមាណ ៦០០ លានម៉ែត្រគូប) ក្នុងមួយថ្ងៃ” ។
រោងចក្រចម្រាញ់ប្រេងនានានៅរដ្ឋតិចសាស បានផ្អាកប្រហែល១ ភាគ៥នៃដំនើរការផលិតប្រេង ស្របពេលមានការកាត់ផ្ដាច់អគ្គិសនី និងអាកាសធាតុត្រជាក់ខ្លាំង។
ទោះជាយ៉ាងណា កាលពីថ្ងៃសុក្រសប្ដាហ៍នេះមានការរំពឹងទុកថា ក្រុមហ៊ុននានានៅក្នុងតំបន់ជួបគ្រោះធម្មជាតិនេះ នឹងត្រៀមដំណើរការផលិតឡើងវិញ ខណៈសេវាផ្គត់ផ្គង់ទឹកភ្លើង បានចាប់ផ្ដើមដំណើរការឡើងវិញជាបណ្ដើរ។
ប្រេងនៅតែធ្លាក់ថ្លៃ បើទោះបីជាស្តុកប្រេងឆៅរបស់សហរដ្ឋអាមេរិក បានធ្លាក់ចុះខ្លាំងគួរឱ្យភ្ញាក់ផ្អើល ក្នុងសប្ដាហ៍គិតត្រឹមថ្ងៃទី១២ កុម្ភៈ មុនពេលព្យុះព្រិលទឹកកកមកដល់យ៉ាងណាក្ដី។
រដ្ឋបាលព័ត៌មានថាមពល (Energy Information Administration) ហៅកាត់ EIA របស់សហរដ្ឋអាមេរិក បានរាយការណ៍កាលពីថ្ងៃព្រហស្បតិ៍ ទី១៨ កុម្ភៈថា ស្តុកប្រេងរបស់សហរដ្ឋអាមេរិក បានធ្លាក់ចុះ៧,៣លានបារ៉ែល មកនៅត្រឹម៤៦១,៨លានបារ៉ែល ដែលជាកម្រិតទាបបំផុតចាប់តាំងពីខែមីនា ឆ្នាំ២០២០មក៕
