ដោយៈ ម៉ាណេត
ភ្នំពេញៈ មន្ត្រីជាន់ខ្ពស់ពន្ធដារបានលើកឡើងថា ពន្ធលើចំណេញមូលធននឹងផ្តល់ផលប្រយោជន៍ធំៗចំនួនពីរ ដែលក្នុងនោះ រដ្ឋាភិបាលតាមរយៈអគ្គនាយកដ្ឋានពន្ធដារ នឹងធានានូវចីរភាព នៃកំណើនចំណូលពន្ធ និងពង្រឹងបាននូវស្ថិរភាពតម្លៃអចលនទ្រព្យសម្រាប់ប្រជាជន។
លោកបណ្ឌិតកែន សម្បត្តិ អគ្គនាយករង នៃអគ្គនាយកដ្ឋានពន្ធារ បានថ្លែងកាលពីពេលថ្មីៗនេះនៅឯសិក្ខាសាលាមួយស្តីពី “ពន្ធលើចំណេញមូលធន”ថា ការដាក់ឱ្យអនុវត្តន៍ពន្ធលើចំណេញមូលធននេះ ទី១ នឹងធានាបាននូវសមធម៌ នៃការបង់ពន្ធដែលនីតិបុគ្គល បានអនុវត្តបង់ពន្ធនេះ តាំងពីប្រព័ន្ធពន្ធដារកម្ពុជា ចាប់អនុវត្តនូវរបបស្វ័យប្រកាស និងធានានូវការប្រកួតប្រជែងដោយស្មើភាព។
ជាពិសេសពន្ឋមូលធននឹងធានានូវចីរភាព នៃកំណើនចំណូលពន្ធ ស្របតាមកម្មវិធីកែទម្រង់ការគ្រប់គ្រងហិរញ្ញវត្ថុសារធារណៈ និងយុទ្ធសាស្ត្រកៀរគរចំណូល ២០១៩-២០២៣ ហើយទី២) និងពង្រឹងបាននូវស្ថិរភាព តម្លៃអចលនទ្រព្យ តាមរយៈការកាត់បន្ថយការលក់បំប៉ោងតម្លៃអចលនទ្រព្យ ហើយប្រជាពលរដ្ឋ និងវិនិយោគិនអាចទិញអចលនទ្រព្យក្នុងតម្លៃសមរម្យ។
លោកបានបញ្ជាក់ថា ពន្ធលើចំណេញមូលធន ត្រូវបានលើកលែង ចំពោះការលក់ ឬផ្ទេរមូលធនមួយចំនួនរួមមាន ទី១ ទ្រព្យដែលជាកម្មសិទ្ធិរបស់ស្ថាប័នរដ្ឋ ទី២ ទ្រព្យជាកម្មសិទ្ធិរបសបេសកកម្មទូត ឬកុងស៊ុលបរទេស អង្គការអន្តរជាតិ ឬទីភ្នាក់ងារសហប្រតិបត្តិការបច្ចេកទេស នៃរដ្ឋាភិបាលដទៃ។
ទី៣ និវាសនដ្ឋានជាគោលដើមរបស់អ្នកជាប់ពន្ធ ដែលបានកាន់កាប់ក្នុងរយៈពេលយ៉ាងតិច៥ឆ្នាំ មុនពេលលក់ឬផ្ទេរ។ ក្នុងករណីមាននិវាសនដ្ឋានច្រើនជាងមួយ ឬអ្នកជាប់ពន្ធ និងសហព័ទ្ធមាននិវាសនដ្ឋានផ្សេងពីគ្នា និវាសនដ្ឋានតែមួយប៉ុណ្ណោះ ដែលត្រូវបានអនុញ្ញាតជានិវាសនដ្ឋានជាគោលដើម។
ទី៤ អចលនទ្រព្យក្នុងរង្វង់ញាតិ ដូចមានចែងក្នុងបទប្បញ្ញត្តិ ស្តីពីពន្ធប្រថាប់ត្រា វៀរលែងតែការផ្ទេរកម្មសិទ្ធិ ឬសិទ្ធិកាន់កាប់អចលនទ្រព្យរវាងបងប្អូនបង្កើត និងបងប្អូនបង្កើត រវាងឪពុក-ម្តាយក្មេកនិងកូនប្រសារ និងរវាងយាយ-តាក្មេកនិងចៅប្រសារ និងទី៥ ទ្រព្យដែលត្រូវបានលក់ឬផ្ទេរ ដើម្បីប្រយោជន៍សាធារណៈ ស្របតាមច្បាប់អស្សាមិករណ៍។
ក្រសួងសេដ្ឋកិច្ច និងហិរញ្ញវត្ថុ បានបញ្ជាក់ថា ពន្ធលើចំណេញមូលធនគ្រោងនឹងអនុវត្តចាប់ពីដើមឆ្នាំ២០២២ ខាងមុខ៕
